Bahubuddhanirhārasamādhimukhaparivartaḥ
Technical Details
bahubuddhanirhārasamādhimukhaparivartaḥ
atha khalu bhagavāṃstāṃ mahatīṃ sāgaropamāṃ parṣadaṃ dharmakathayā saṃdarśya samuttejya saṃpraharṣya samādāpya utthāyāsanāt prākrāmat | yena ca gṛdhrakūṭaparvatarājastenaiva upasamakrāmat | upasaṃkramya ca prajñapta evāsane nyaṣīdat | bhikṣusaṃghaparivṛto devanāgayakṣagandharvāsuragaruḍakinnaramahoragamanuṣyāmanuṣyanamaskṛtaḥ sāgaropamāyāṃ parṣadi dhama saṃdeśayati sma | atha khalu candraprabhaḥ kumārabhūto bhagavantaṃ nirgataṃ viditvā aśītyā prāṇikoṭīśataiḥ sārdhaṃ sarvairdevabhūtairanyalokadhātvāgataiśca saṃbahulairbodhisattvamahāsattvaniyutaiḥ sārdhaṃ puṣpadhūpagandhamālyavilepanaṃ gṛhītvā tūryaśatairvādyamānaiśchatradhvajaghaṇṭāpatākābhiratyucchritābhiḥ mahāmālyābhinirhāramādāya bhagavataḥ pūjākarmaṇe yena gṛdhrakūṭaparvato yena ca bhagavāṃstenopajagāma | upetya ca bhagavataḥ pādau śirasābhivandya bhagavantaṃ triḥ pradakṣiṇīkṛtya taiḥ puṣpadhūpagandhamālyavilepanaistūryatālāvacaraiḥ pravādyamānairmahatīṃ pūjāṃ kṛtvā ekānte nyaṣīdat sagauravaḥ sapratīśo dharmaparipṛcchāyai ||
atha khalu candraprabhaḥ kumārabhūto bhagavantametadavocat-pṛccheyamahaṃ bhagavantaṃ tathāgatamarhantaṃ samyaksaṃbuddhaṃ kaṃcideva pradeśaṃ sacenme bhagavānavakāśaṃ kuryāt pṛṣṭapraśnavyākaraṇāya | evamukte bhagavāṃścandraprabhaṃ kumārabhūtametadavocat-pṛccha tvaṃ kumāra tathāgatamarhataṃ samyaksaṃbuddhaṃ yad yadevākāṅkṣasi | nityakṛtaste kumāra tathāgatenāvakāśaḥ | evamukte candraprabhaḥ kumārabhūto bhagavantametadavocat-katibhirbhagavan dharmaiḥ samanvāgato bodhisattvaḥ imaṃ sarvadharmasvabhāvasamatāvipañcitaṃ samādhiṃ pratilabhate ? evamukte bhagavāṃścandraprabhaṃ kumārabhūtametadavocat-caturbhiḥ kumāra dharmaiḥ samanvāgato bodhisattvaḥ imaṃ sarvadharmasvabhāvasamatāvipañcitaṃ samādhiṃ pratilabhate | katamaiścaturbhiḥ ? iha kumāra bodhisattvo mahāsattvaḥ sūrato bhavati suvisaṃvāso dānto dāntabhūmimanuprāptaḥ | sa parairākruṣṭo vā paribhāṣito vā duruktānāṃ durbhāṣitānāṃ vacanapathānāṃ kṣamo bhavatyadhivāsanajātīyaḥ karmadarśī nihatamāno dharmakāmaḥ | anena kumāra prathamena dharmeṇa samanvāgato bodhisattvo mahāsattvaḥ imaḥ samādhiṃ pratilabhate | punaraparaṃ kumāra bodhisattvo mahāsattvaḥ śīlavān bhavati | pariśuddhaśīlaḥ akhaṇḍaśīlaḥ acchidraśīlaḥ aśabalaśīlaḥ akalmaṣaśīlaḥ acyutaśīlaḥ anāvilaśīlaḥ agarhitaśīlaḥ abhyudgataśīlaḥ aniśritaśīlaḥ aparāmṛṣṭaśīlaḥ anupalambhaśīlaḥ āryapraśastaśīlo vijñapraśastaśīlaḥ | anena kumāra dvitīyena dharmeṇa samanvāgato bodhisattvo mahāsattvaḥ ima samādhiṃ pratilabhate | punaraparaṃ kumāra bodhisattvo mahāsattvastraidhātuke uttrastacitto bhavati saṃtrastacitto nirviṇṇacitto niḥsaraṇacittaḥ | anarthikaḥ anabhirataḥ anadhyavasitaḥ anabhiṣaktaḥ | sarvatraidhātuke udvignamānasaḥ | anyatra traidhātukāt sattvāni mocayiṣyāmīti vyāyamate | samudāgacchatyanuttarāyāṃ samyaksaṃbodhau | anena kumāra tṛtīyena dharmeṇa samanvāgato bodhisattvo mahāsattva imaṃ samādhiṃ pratilabhate | punaraparaṃ kumāra bodhisattvo mahāsattvaḥ śrāddho bhavati | atṛpto bhavati dharmaparyeṣṭyām | bahuśruto bhavati | viśārado bhavati | dharmakāmaśca dharmagurukaḥ | na lābhasatkāraślokaguruko na jñānagurukaḥ | yathāśrutāṃśca dharmān yathāparyavāptān parebhyaśca vistareṇa deśayati saṃprakāśayati hitavastupūrvagamena cittena na jñātralābhakāmanayā | api tu khalu punaḥ kimitīme sattvā imān dharmān śrutvā avinivartanīyā bhaveyuranuttarāyāḥ samyaksaṃbodheriti | anena kumāra caturthena dharmeṇa samanvāgato bodhisattvo mahāsattvaḥ imaṃ samādhiṃ pratilabhate ||
ebhiḥ kumāra caturbhirdharmaiḥ samanvāgato bodhisattvo mahāsattva imaṃ sarvadharmasvabhāvasamatāvipañcitaṃ samādhiṃ pratilabhate kṣipraṃ cānuttarāṃ samyaksaṃbodhibhabhisaṃbudhyate | tadanenāpi te kumāra paryāyeṇaivaṃ veditavyaṃ yathāyaṃ samādhirbahubuddhadeśito bahubuddhavarṇito bahubuddhasaṃprakāśito bahubuddhapravicitaḥ | bahūnāṃ ca buddhānāṃ bhagavatāmantikānmayā pravrajitvā ayaṃ kumāra sarvadharmasvabhāvasamatāvipañcitaḥ samādhirvistareṇa śruta udgṛhītaḥ pṛṣṭo dhārito vācitaḥ pravartito'raṇabhāvanayā bhāvito bahulīkṛtaḥ parebhyaśca vistareṇa saṃprakāśitaḥ | atha khalu bhagavānimameva bahubuddhanirhārasamādhimukhaṃ pūrvayogakathānirdeśaṃ bhūyasyā mātrayā tasyāṃ velāyāṃ candraprabhasya kumārabhūtasya vistareṇa gāthābhigītena saṃprakāśayati sma -
smarāmi kalpe'tuliyāprameye
yadā jino āsi svarāṅgaghoṣaḥ |
svarāṅgaghoṣasya tathāgatasya
varṣaṃ śatā ṣaṣṭi abhūṣi āyuḥ || 1 ||
tasyānu buddho parimeṇa āsīt
jñāneśvaro nāma narāṇamuttamaḥ |
jñāneśvarasya dvipadottamasya
varṣaṃ sahasrā daśa dvau ca āyuḥ || 2 ||
jñāneśvarasyāpi pareṇa buddho
tejeśvaro nāma jino abhūṣi |
tejeśvarasya dvipadottamasya
ṣaṭsaptatī varṣasahasra āyuḥ || 3 ||
tejeśvarasyoparatena buddho
matīśvaro nāma jino abhūṣi |
matīśvarasya dvipadottamasya
varṣāṇa koṭī paripūrṇa āyuḥ || 4 ||
matīśvarasyoparatena buddho
brahmeśvaro nāma jino abhūṣi |
brahmeśvarasya dvipadottamasya
caturdaśo varṣasahasra āyuḥ || 5 ||
brahmeśvarasyoparatena buddho
agnīśvaro nāma jino abhūṣi |
agnīśvarasya dvipadottamasya
ṣaṣṭistadā varṣasahasra āyuḥ || 6 ||
agnīśvarasyoparatena buddho
brahmānano nāma jino abhūṣi |
brahmānanasya dvipadottamasya
rātriṃdivā sapta abhūṣi āyuḥ || 7 ||
brahmānanasyoparatena buddho
gaṇeśvaro nāma jino abhūṣi |
gaṇeśvarasya dvipadottamasya
ṣaḍvarṣakoṭyaḥ paripūrṇa āyuḥ || 8 ||
gaṇeśvarasyoparatena buddho
ghoṣeśvaro nāma jino abhūṣi |
ghoṣeśvarasya dvipadottamasya
navavarṣakoṭyaḥ paripūrṇa āyuḥ || 9 ||
ghoṣeśvarasyoparatena buddho
ghoṣānano nāma jino abhūṣi |
ghoṣānanasya dvipadottamasya
daśavarṣakoṭyaḥ paripūrṇa āyuḥ || 10 ||
ghoṣānanasyoparatena buddha-
ścandrānano nāma jino abhūṣi |
candrānanasya dvipadottamasya
rātriṃdivā eka abhūṣi āyuḥ || 11 ||
candrānanasyoparatena buddhaḥ
sūryānano nāma jino abhūṣi |
sūryānanasya dvipadottamasya
aṣṭādaśo varṣasahasra āyuḥ || 12 ||
sūryānanasyoparatena buddho
brahmānano nāma jino abhūṣi |
brahmānanasya dvipadottamasya
triviṃśati varṣasahasra āyuḥ || 13 ||
brahmānanasyoparatena buddho
brahmaśravo nāma jino abhūṣi |
brahmaśravasya dvipadottamasya
aṣṭādaśo varṣasahasra āyuḥ || 14 ||
ekasmi kalpasmi ime upannā
duve śate lokavināyakānām |
śruṇohi nāmāniha kīrtayiṣye
anābhibhūtān tathāgatānām || 15 ||
anantaghoṣaśca vighuṣṭaghoṣo
vighuṣṭatejaśca vighuṣṭaśabdaḥ |
svarāvighuṣṭaśca svarārcitaśca
svarāṅgaśūraśca svarāṅgaśabdaḥ || 16 ||
jñānābalo jñānaviśeṣagaśca
jñānābhibhūrjñānasamudgataśca |
jñānārcimān jñāna-abhyudgataśca
vighuṣṭajñānastatha jñānaśūraḥ || 17 ||
brahmābalo brahmavasuḥ subrahma
brahmā ca devastatha brahmaghoṣaḥ |
brahmeśvaro brahmanarendranetre
brahmasvarāṅgaḥ svarabrahmadattaḥ || 18 ||
tejobalastejavatiḥ sutejāḥ
tejeśvarastejasamudrataśca
tejovibhustejaviniścitaśca |
tejasvarendraḥ suvighuṣṭatejāḥ || 19 ||
bhīṣmo balo bhīṣmamatiḥ subhīṣmo
bhīṣmānano bhīṣmasamudrataśca |
bhīṣmārci rbhīṣmottaru rbhīṣmaghoṣā
ete jinā lokavināyakā'bhūt || 20 ||
gambhīraghoṣaḥ śiridhāraṇaśca
viśuddhaghoṣeśvaru śuddhaghoṣaḥ |
anantaghoṣaḥ suvimuktaghoṣo
māro balo māravitrāsanaśca || 21 ||
sunetra śuddhānanu netraśuddho
viśuddhanetraśca anantanetraḥ |
samantanetraśca vighuṣṭanetro
netrābhibhūrnetra aninditaśca || 22 ||
dāntottaro dānta sudāntacittaḥ
sudānta śāntedriya śāntamānasaḥ |
śāntottaraḥ śāntaśirī praśāntaḥ
śāntīya pāraṃgatu śāntiśūraḥ || 23 ||
sthitottaraḥ śānta sudāntacittaḥ
sudāntaśāntendriyu śāntamānasaḥ |
śāntottaraḥ śāntaśriyā jvalantaḥ
śāntapraśānteśvaru śāntiśūraḥ || 24 ||
gaṇendra gaṇamukhyu gaṇeśvaraśca
gaṇābhibhūrgaṇivara śuddhajñānī |
mahāgaṇendraśca gaṇendraśūro
anyo puno gaṇivara pramocakaḥ || 25 ||
dharmadhvajaśco tatha dharmaketuḥ
dharmottaro dharmasvabhāva udgataḥ |
dharmabalaścaiva sudharmaśūraḥ
svabhāvadharmottaraniścitaśca || 26 ||
svabhāvadharmottaraniścitasya
aśītikoṭyaḥ sahanāmadheyāḥ |
dvitīyakalpasmi utpanna nāyakā
ete mayā pūjita bodhikāraṇāt || 27 ||
svabhāvadharmottaraniścitasya
yo nāmadheyaṃ śṛṇute jinasya |
śrutvā ca dhāreti vighuṣṭa nāma
sa kṣiprametaṃ labhate samādhim || 28 ||
eteṣa buddhān pareṇa anyo
acintiye aparimitasmi kalpe |
abhūṣi buddho naradevapūjitaḥ
sa nāmadheyena narendraghoṣaḥ || 29 ||
narendraghoṣasya tathāgatasya
ṣaṭsaptatī varṣasahasramāyuḥ |
trayaśca koṭīśata śrāvakāṇāṃ
yaḥ sannipātaḥ prathamo abhūṣi || 30 ||
ṣaḍabhijña traividya jitendriyāṇāṃ
mahānubhāvāna maharddhikānām |
kṣīṇāsravāṇāntimadehadhāriṇāṃ
saṃghastadā āsi prabhākarasya || 31 ||
aśīti koṭīniyutā sahasrā
yo bodhisattvāna gaṇo abhūṣi |
gambhīrabuddhīna viśāradānāṃ
mahānubhāvāna maharddhikānām || 32 ||
abhijñaprāptāḥ pratibhānavanto
gatigatāḥ sarvita śunyatāyāḥ |
ṛddhīya gacchanti te kṣetrakoṭiyo
tatottare yāttika gaṅgavālukāḥ || 33 ||
pṛcchitva praśnaṃ dvipadānanuttamān
punenti tasyaiva jinasya antike |
sūtrāntanirhāraniruktikovidā
ālokabhūtā vicaranti medinīm || 34 ||
sattvānamarthāya caranti cārikāṃ
mahānubhāvāḥ sugatasya putrāḥ |
na kāmahetoḥ prakaronti pāpaṃ
devā pi teṣāṃ spṛha saṃjanenti || 35 ||
anarthikā bhavagatiṣu na niśritāḥ
samāhitā dhyānavihāragocarāḥ |
viniścitārthāśca viśāradāśca
nirāmagandhāḥ sada brahmacāriṇaḥ || 36 ||
acchedyavākyāḥ pratibhānavanto
niruktinirdeśapadārthakovidāḥ |
sarvatrasaṃdarśaka buddhaputrāḥ
parigṛhītāḥ kuśalena karmaṇā || 37 ||
anantakalpāścariyāya udgatāḥ
stutāḥ praśastāḥ sada nāyakehi |
vimokṣatattvārthapadāna deśakāḥ
asaṃkiliṣṭāḥ suviśuddhaśīlāḥ || 38 ||
anopaliptāḥ padumena vāriṇā
vimukta traidhātukato'pramattāḥ |
anopaliptāṣṭahi lokadharmai-
rviśuddhakāyāḥ pariśuddhakarmāḥ || 39 ||
alpeccha saṃtuṣṭa mahānubhāvā
agṛddha te buddhaguṇāḥ pratiṣṭhitāḥ |
sarveṣa sattvāna gatiḥ parāyaṇā
na ghoṣamātrapratipattisārāḥ || 40 ||
yatra sthitāstaṃ ca pareṣu deśayu
sarvehi buddhehi parigṛhītāḥ |
vaiśvāsikāḥ kośadharā jinānāṃ
te sarvi traidhātuki trastamānasāḥ || 41 ||
praśāntacittāḥ sada raṇyagocarā
adhiṣṭhitā lokavināyakebhiḥ |
bhāṣanti sutrāntasahasrakoṭiyo
yaṃ caiva bhāṣanti ta buddhavarṇitam || 42 ||
vivarjitāḥ sarvapadebhi laukikāḥ
śūnyādhimuktāḥ paramārthadeśakāḥ |
anantavarṇā guṇasāgaropamāḥ
bahuśrutāḥ paṇḍita vijñavantaḥ || 43 ||
sacet kumāro bahukalpakoṭiya
adhiṣṭhihantaḥ pravadeya varṇam |
sa alpakaṃ tat parikīrtitaṃ bhaved
yathā samudrādudabindurekaḥ || 44 ||
tasmiṃśca kāle sa narendraghoṣo
deśetimaṃ śānta samādhi durdṛśam |
mahātrisāhasriya lokadhātu
devehi nāgehi sphuṭo abhūṣi || 45 ||
tasyo imaṃ śānta samādhi bhāṣataḥ
prakampitā medini ṣaḍvikāram |
devā manuṣyā yatha gaṅgavālikā
avivartikāye sthita buddhajñāne || 46 ||
tatrāsi rājā manujāna īśvaraḥ
śirībalo nāma mahānubhāvaḥ |
putrāṇa tasyo śata pañca āsa-
nnabhirūpa prāsādika darśanīyāḥ || 47 ||
aśīti koṭīśata istriyāṇā-
mantaḥpuraṃ tasya abhūṣi rājñaḥ |
caturdaśo koṭisahasra pūrṇā
duhitaro tasya abhūṣi rājñaḥ || 48 ||
sa kārtikāyāṃ tada pūrṇamāsyā-
maṣṭāṅgikaṃ poṣadhamādaditvā |
aśītikoṭīniyutehi sārdha-
mupāgamallokagurusya antikam || 49 ||
vanditva pādau dvipadottamasya
nyaṣīdi rājā purato jinasya |
adhyāśayaṃ tasya viditva rājño
imaṃ samādhiṃ dvipadendra deśayi || 50 ||
sa pārthivaḥ śratva samādhimeta-
mutsṛjya rājyaṃ yatha kheṭapiṇḍam |
parityajitvā priya jñātibāndhavān
sa pravrajī tasya jinasya śāsane || 51 ||
putrāṇa pañcāśata pravrajiṃsu
antaḥpuraṃ caiva tathaiva dhītaro |
anye ca tatra putrajñātibāndhavāḥ
ṣaṭsaptatirnayuta trayaśca koṭyaḥ || 52 ||
sa pravrajitveha saputradāraṃ
sthapetva āhāranirhārabhūmim |
adhiṣṭhitaścaṃkrami aṣṭavarṣaṃ
sa caṃkrame vasthitu kāla kārṣīt || 53 ||
sa kālu kṛtvā tada rājakuñjaro
samādhicitto susamāhitaḥ sadā |
tatraiva so rājakule upanno
upapāduko garbhamalairaliptaḥ || 54 ||
dṛḍhabalo nāma pitāsya bhūṣi
mahāmatī nāma janetri āsīt |
sa jātamātro avacī kumāro
kaccinnu so tiṣṭhati lokanāthaḥ || 55 ||
jānāti me āśayu lokanātho
yeno mamā śānta samādhi deśitaḥ |
apratyayā apagatapratyayā ca
yo eka nirdeśu bhave gatīnām || 56 ||
yā sarvadharmāṇa svabhāvamudrā
yaḥ sūtrakoṭīniyutāna āgamaḥ |
yo bodhisattvāna dhanaṃ nirūttaraṃ
kaccijjino bhāṣati taṃ samādhim || 57 ||
kāyasya śuddhī tatha vāca śuddhī
cittasya śuddhistatha dṛṣṭiśuddhiḥ |
ārambaṇānāṃ samatikramo yaḥ
kaccijjino bhāṣati taṃ samādhim || 58 ||
avipraṇāśaḥ phaladharmadarśanaṃ
aṣṭāṅgikā mārgavarasya bhāvanā |
tathāgataiḥ saṃgamu tīkṣṇaprajñatā
satyapraveśaḥ sada dharmajñānam || 59 ||
skandhaparijñā samatā ca dhātunā-
mapakarṣaṇaṃ cāyatanāna sarvaśaḥ |
anutpāda sākṣātkriyayāvatāraḥ
kaccijjino bhāṣati taṃ samādhim || 60 ||
pratisaṃvidā śāntyavatārajñānaṃ
sarvākṣarāṇāṃ ca prabhedajñānam |
vastuniveśasamatikramo yaḥ
kaccijjino bhāṣati taṃ samādhim || 61 ||
ghoṣaḥ parijñātha prāmodyalābhaḥ
prītiśca bhotī sugatāna varṇam |
āryā gatirmārdavatā ca ujjukā
kaccijjino bhāṣati taṃ samādhim || 62 ||
nā jātu kuryādbhukuṭiṃ sa sūrataḥ
sākhilya mādhurya smitaṃ mukhaṃ ca |
dṛṣṭvā ca sattvān prathamālapeti
kaccijjino bhāṣati taṃ samādhim || 63 ||
anālasyatā gauravatā gurūṇāṃ
śuśrūṣaṇā vandana premadarśanā |
upapatti saṃtuṣṭita śuklatā ca
kaccijjino bhāṣati taṃ samādhim || 64 ||
ājīvaśuddhistatha raṇyavāso
dhūte sthitānusmṛterapramoṣaḥ |
skandheṣu kauśalyamathāpi dhātuṣu
kaccijjino bhāṣati taṃ samādhim || 65 ||
āyatanakauśalyamabhijñajñānaṃ
kileśa-apakarṣaṇa dāntabhūmi |
pṛthusarvamantrāṇamasāvucchedaḥ
kaccijjino bhāṣati taṃ samādhim || 66 ||
samatikramaḥ sarvabhavaggatīnāṃ
jātismṛti dharmaniṣkāṅkṣatā ca |
dharme ca cittaṃ śruta eṣaṇā ca
kaccijjino bhāṣati taṃ samādhim || 67 ||
viśeṣagāmī sada bhāvanārati
āpatti kauśalyata niḥsṛtau sthitaḥ |
yatra sthito'nuśayitāṃ jahāti
kaccijjino bhāṣati taṃ samādhim || 68 ||
tīkṣṇasya jñānasya varāgamo yato
acāliyo śailasamo akampitaḥ |
avivartitālakṣaṇa dhāraṇīmukhaṃ
kaccijjino bhāṣati taṃ samādhim || 69 ||
śuklāna dharmāṇa sadā gaveṣaṇā
pāpāna dharmāṇa sadā vivarjanā |
saṃkleśapakṣasya sadā pracāru yo
kaccijjino bhāṣati taṃ samādhim || 70 ||
sarvāsu śikṣāsu gatiṃgato viduḥ
samādhyavasthānagatiṃgataśca |
sattvāna co āśayu jñātva codako
deśeti dharmaṃ varabuddhabodhau || 71 ||
viśeṣajñānaṃ upapattijñānaṃ
anantajñānaṃ susamāptajñānam |
sarvaggatīnāṃ pratisaṃdhijñānaṃ
kaccijjino bhāṣati taṃ samādhim || 72 ||
gṛhān samutsṛjya pravrajyacittaṃ
traidhātuke anabhiratī nanugrahaḥ |
cittasya saṃpragrahaṇaṃ saharṣaṇā
deśeti dharmaṃ dvipadānamuttamaḥ || 73 ||
dharmeṣu co nābhiniveśa tāyi
parigraho dharmavare sadā ca |
karmavipāke ca dṛḍhādhimuktiṃ
deśeti dharma dvipadānamuttamaḥ || 74 ||
vinayasmi kauśalya vipākajñānaṃ
kalahaṃ vivādāna tathopaśāntiḥ |
avigrahaṃ vāpyavivādabhūmiṃ
deśeti dharma dvipadānamuttamaḥ || 75 ||
kṣāntīsamādānamakrodhasthānaṃ
viniścaye dharmi sadā ca kauśalam |
padaprabhedeṣu ca jñānadarśanaṃ
deśeti dharmaṃ karuṇāṃ janetvā || 76 ||
pūrvāntajñānamaparāntajñānaṃ
triyadhva-samatā sugatāna śāsane |
pariccheda uktaḥ sa trimaṇḍalasya
evaṃ jino deśayi dharmasvāmī || 77 ||
cittavyavasthāna ekāgratā ca
kāyavyavasthāna yathāryabhūmiḥ |
īryāpathastho sada kāli rakṣaṇā
deśeti dharmaṃ puruṣarṣabho muniḥ || 78 ||
hiriśca otrāpyu prāsādikaṃ ca
yuktāṃ giraṃ bhāṣati lokajñānam |
pravṛttidharmaṃ prakṛtiṃ ca prāṇināṃ
deśeti dharmaṃ varabodhiumagryām || 79 ||
anugrahaṃ co hirimotrāpyaṃ ca
cittasya cākuśalatā jugupsanā |
dhūtasyānutsargata piṇḍacaryāṃ
deśeti dharmaṃ dvipadānamuttamaḥ || 80 ||
hiriśca otrāpyu sadācaretā
gurūṇābhivādana pratyutthānam |
mānasya co nigraha āditaiva
evaṃ jino deśayi dharmasvāmī || 81 ||
cittasamutthānata cittakalyatā
jñānapratīvedhu tathānubodham |
ajñānapakṣasya sadā vivarjanā
deśeti dharmān varabuddhabodhim || 82 ||
cittapraveśaṃ ca rūtasya jñānaṃ
niruktyavasthāna viniścitārtham |
sarveṣvanarthāna sadā vivarjanam
evaṃ jino deśayi dharmasvāmī || 83 ||
sasaṅgatā satpuruṣehi nityaṃ
vivarjanā kāpuruṣāna caiva |
jine prasādaṃ sada prematāṃ ca
evaṃ jino deśayi dharma śreṣṭham || 84 ||
saṃketaprajñaptivyāhāratāṃ ca
saṃsāraduḥkhāni sadā vivarjanā |
alābhi lābhe ca asaktabhāva-
mevaṃ jino deśayi dharmamuttamam || 85 ||
satkāru labdhvā ca na vismayeyyā
asatkṛtaścāpi bhavedupekṣakaḥ |
bhūte'pi varṇaṃ na kadāci modiye
iya deśanā lokahitasya īdṛśī || 86 ||
ākrośanāṃ paṃsana sarvaśo sahe-
dasaṃstavaḥ sarvagṛhīhi sārdham |
saṃsargatāṃ pravrajitena kuryā-
devaṃ jino deśayi dharmasvāmī || 87 ||
buddhāna co gocari supratiṣṭhito
agocaraṃ sarva vivarjayitvā |
ācārasaṃpanna sudāntacitto
iya dharmanetrī sugatena deśitā || 88 ||
ye bāladharmāḥ sada tān vivarjayet
kuladūṣaṇaṃ sarva vivarjayecca |
ārakṣitavyaṃ sada buddhaśāsanaṃ
evaṃ jino deśayi dharmasvāmī || 89 ||
alpaṃ ca bhāṣye madhuraṃ suyuktaṃ
kalyāṇatāṃ mṛduvacanaṃ pareṣām |
pratyarthikānāṃ sahadharmanigraho
iyaṃ jine īdṛśa ānuśāsanī || 90 ||
pratikramet kāli na co akāle
na viśvaset sarvapṛthagjaneṣu |
duḥkhena spṛṣṭo na bhaveta durmanā
iyaṃ jine īdṛśa ānuśāsanī || 91 ||
daridra dṛṣṭvā sadhanaṃ kareyyā
duḥśīla dṛṣṭvā anukampitavyā |
hitavastutāyāṃ sada ovadeyya
iyaṃ jine īdṛśa ānuśāsanī || 92 ||
dharmeṇa sattvā anugṛhṇitavyā
lokāmiṣatyāgu sadā ca kāryo |
na saṃcayaṃ no nicayaṃ ca kuryā-
diyaṃ jine īdṛśa ānuśāsanī || 93 ||
śīlapraśaṃsā ca kuśīlakutsanā
aśāṭhyatā śīlavatāṃ niṣevaṇam |
sarvasvakātyāgi dhane'pyaniśrito
iyaṃ jine īdṛśa ānuśāsanī || 94 ||
adhyāśayeno guruṇā nimantraṇā
yathā ca bhāṣe tatha sarva kuryām |
abhīkṣṇa seveyya ca dharmabhāṇakaṃ
iyaṃ jine īdṛśa ānuśāsanī || 95 ||
sagauravaḥ prītamanāḥ sadā bhavet
somyāya dṛṣṭīya sadā sthito bhavet |
pūrvāsu caryāsu suniścitaḥ sadā
iyaṃ jine īdṛśa ānuśāsanī || 96 ||
pūrvaṃgamaḥ kuśalacarīṣu nitya-
mupāyakauśalya nimittavajane |
saṃjñāvivarte tatha vastulakṣaṇe
iyaṃ jine īdṛśa ānuśāsanī || 97 ||
sūtrāntanirhārapadeṣu kauśalaṃ
satyāna nirdeśapadeṣu niścayaḥ |
vimuktijñānasya ca sākṣikāritā
iyaṃ jine īdṛśa ānuśāsanī || 98 ||
śūnyāśca dharmāḥ sada sevitavyā
viśāradāḥ śīlabale pratiṣṭhitāḥ |
samādhisthānena samottareyyā
iyaṃ jine īdṛśa ānuśāsanī || 99 ||
na jñātralābhaṃ pi kadāci deśaye-
ccittasya cāpī kuhanāṃ na kuryāt |
dṛṣṭīkṛtāṃ sarva vivarjayecca
iyaṃ jine īdṛśa ānuśāsanī || 100 ||
pratibhānu śreṣṭhaṃ vara dhāraṇīye
jñānasya cobhāsu anantapāro |
adhiṣṭhānamantra pratibhānayukti-
riyaṃ jine īdṛśa ānuśāsanī || 101 ||
śīlasya dvāramima mārgabhāvanā
pratipatti-ovāda-nayaśca bhadrako |
anuśāsanī atra caritva śāsanī
iyaṃ jine īdṛśa ānuśāsanī || 102 ||
anulomikī kṣānti ya buddhavarṇitā
kṣāntisthito doṣa vivarjayeta |
ajñāna varjeyya sthihitva jñāne
iyaṃ jine īdṛśa ānuśāsanī || 103 ||
jñānapratiṣṭhā tatha yogabhūmī
yogeśvarī bodhayi prasthitānām |
niṣevaṇā satpuruṣāṇa nityaṃ
iyaṃ jine īdṛśa ānuśāsanī || 104 ||
ayuktayogīna sadā vivarjanā
tathāgatairbhāṣita buddhabhūmi |
anumoditā sarvihi paṇḍitehi
iyaṃ jine īdṛśa ānuśāsanī || 105 ||
bālaiḥ pratikṣipta ajñātakehi
abhūbhiratra pṛthuśrāvakāṇām |
parigṛhītāḥ sada bodhisattvaiḥ
iyaṃ jine īdṛśa ānuśāsanī || 106 ||
tathāgatehi anubuddhametaṃ
devehi co satkṛtu pūjitaṃ ca |
anumoditaṃ brahmasahasrakoṭibhiḥ
kaccijjino bhāṣati taṃ samādhim || 107 ||
nāgasahasrehi sadā susatkṛtaṃ
suparṇayakṣehi ca kinnarehi |
yā bhāṣitā bodhivarā jinebhiḥ
kaccijjino bhāṣati taṃ samādhim || 108 ||
paryāpta yā nityu supaṇḍitehi
dhanaṃ ca śriṣṭhaṃ pravaraṃ sulabdham |
nirāmiṣaṃ jñāna cikitsa uttamā
kaccijjino bhāṣati taṃ samādhim || 109 ||
jñānasya koṣaḥ pratibhānamakṣayaṃ
sūtrāntakoṭīna praveśa eṣaḥ |
parijña traidhātuki bhūtajñānaṃ
kaccijjino bhāṣati taṃ samādhim || 110 ||
naukā iyaṃ deśita pāragāmināṃ
nāvā pi co oghagatāna eṣā |
kīrtiryaśo vardhati varṇamālā
yeṣāmayaṃ śānta samādhi deśitaḥ || 111 ||
praśaṃsa eṣā ca tathāgatānāṃ
stavaśca eṣo puruṣarṣabhāṇām |
stava bodhisattvāna nayaśca akṣayo
yehī ayaṃ śānta samādhi deśitaḥ || 112 ||
maitrī iyaṃ doṣaśame prakāśitā
upekṣiyaṃ kāruṇikāna bhūmim |
āśvāsayanteṣa mahāśayānāṃ
yeṣāṃ kṛtenaiṣa samādhi bhāṣitaḥ || 113 ||
pratipattiyaṃ deśita siṃhanādinā-
mitu buddhajñānasya varasya āgamaḥ |
sarveṣa dharmāṇa svabhāvamudrāḥ
samādhyayaṃ deśitu nāyakehi || 114 ||
sarvajñajñānasya ca āharitrimā
caryā iyaṃ bodhayi prasthitānām |
vitrāsanaṃ māracamūya cāpi
samādhyayaṃ śānta jinena deśitaḥ || 115 ||
vidyā iyaṃ dharmasthitāna tāyināṃ
amitramadhye paramā ca rakṣā |
pratyarthiṃkānāṃ sahadharmanigrahāḥ
samādhyayaṃ śānta jinena deśitaḥ || 116 ||
pratibhānabhūmī iya saṃprakāśitā
balā vimokṣā tatha indriyāṇi |
viśiṣṭa aṣṭādaśa buddhadharmāḥ
samādhi śānteṣa niṣevamāṇāḥ || 117 ||
daśāna paryeṣṭi balāna bhūtā
pūrvanimittaṃ pi ca buddhajñāne |
ye buddhadharmāḥ puruṣottamena
prakāśitā lokahitānukampinā || 118 ||
buddhāna putrebhirayaṃ pratīhito
vimokṣakāmānayu mārgu deśitaḥ |
prītiśca tasmin sugatātmajānāṃ
śruṇitvimaṃ śānta samādhi durdṛśam || 119 ||
yā buddhajñānasya ca pāripūritā
yābheṣate paṇḍitu bodhisattvaḥ |
viśuddhacittaśca śucirniraṅgaṇo
imaṃ niṣeveta samādhi śāntam || 120 ||
pariśuddha kāyo'sya yathā jināna
vimokṣajñānaṃ ca vimuktidarśanam |
asaṃkiliṣṭaḥ sada rāgabandhanaiḥ
imaṃ niṣeveta samādhi bhadrakam || 121 ||
abhūmi doṣe vigamaśca mohe
jñānasya co āgamu muktimicchataḥ |
vidyāya utpādu avidyanāśakam
imaṃ niṣeveta samādhi śāntam || 122 ||
vimuktisārāṇiya tṛpti bhāṣitā
dhyāyīnayaṃ śānta samādhi deśitaḥ |
cakṣuśca buddhānamaninditānā-
mimaṃ niṣeveta samādhi śāntam || 123 ||
abhijña eṣā bahukṣetre darśitā
ṛddhiśca buddhāna ananta darśitā |
yā dhāraṇī sāpi tato na durlabhā
niṣevamāṇasya samādhimetam || 124 ||
śāntendriyasyo iha sthānu bodhaye
idamadhiṣṭhānamanantadarśitam |
sūkṣmaṃ ca jñānaṃ vipulaṃ viśuddhaṃ
niṣevamāṇasya imaṃ samādhim || 125 ||
su budhyate naiṣa ayuktayogai-
rvivartanaṃ sarvasu akṣarāṇām |
na śakyu ghoṣeṇa vijānanāya
yeno ayaṃ śānta samādhi na śrutaḥ || 126 ||
jñātaṃ tu vijñairayu bodhisattvai-
ryathā va yaṃ deśitu dharmasvāminā |
pratibuddhu śāntehi aninditehi
imaṃ samādhiṃ pratiṣevamāṇaiḥ || 127 ||
ārabdhavīryehi samudgṛhīta-
mupasthitaṃ ca sāpi sadā sudhāritam |
duḥkhakṣayo jātinirodhajñāna-
mimaṃ samādhiṃ pratiṣevamāṇaiḥ || 128 ||
sarveṣa dharmāṇamajāti bhāṣitā
evaṃ ca sarvāsu bhavaggatīṣu |
jñānāgru buddhāna mahāśayānāṃ
kaccijjino bhāṣati taṃ samādhim || 129 ||
tasyo kumārasyimi gātha bhāṣato
aṣṭāśītiniyutasahasra pūrṇāḥ |
ghoṣānugā kṣānti labhiṃsu tatra
avivartikāye sthitu buddhajñāne || 130 ||
dṛḍhabalastamavadī kumāra-
madyāpi so tiṣṭhati lokanāthaḥ |
pṛcchāmi tvaṃ dāraka etamarthaṃ
kutastvayā eṣa śrutaḥ samādhiḥ || 131 ||
kumāru rājan avadī śṛṇohi
dṛṣṭasmi koṭīniyutaṃ jinānām |
ekasmi kalpasmi te sarvi satkṛtā
ayaṃ ca me śānta samādhi pṛcchitaḥ || 132 ||
catvāri kalpā navatiṃ ca anye
kalpāna koṭīniyutā sahasrāḥ |
jātismaro bhomyahu tatra tatra
na cāpi garbhe upapadyi jātu || 133 ||
tato mayā eṣā samādhi bhāvitaḥ
śuddhaṃ śrutasteṣa jināna bhāṣatām |
śrutvā ca uddiṣṭu janetva chandaṃ
niṣkāṅkṣaāptena spṛśiṣyi bodhim || 134 ||
ye bhikṣu mahyaṃ paripṛcchadenti
paryāpuṇantasya imaṃ samādhim |
upasthapemī ahu tatra gauravaṃ
yathaiva lokārthakarāṇa antike || 135 ||
yeṣāṃ mayā antika eka gāthā
uddiṣṭa caryāṃ caratānulomikīm |
mānyāmi tānapyahu śāntu ete
upasthapemī ahu buddhagauravam || 136 ||
yaścāpi māṃ pṛcchitu kaścideti
paryāpuṇantaṃ imu satsamādhim |
svapnāntare'pīha na me'sti kāṅkṣā
nāhaṃ bhaviṣye jinu lokanāyakaḥ || 137 ||
vṛddheṣu madhyeṣu naveṣu bhikṣuṣu
sagauravo bhomyahu supratītaḥ |
sagāravasyo mama vardhate yaśaḥ
puṇyaṃ ca kīrtiśca guṇāstathaiva || 138 ||
kalīvivādeṣu na bhomi utsuko
alpotsuko bhomyahu tatra kāle |
anyā gatirbhoti karitva pāpakaṃ
anyā gatirbhoti karitva bhadrakam || 139 ||
ayuktayogāna asaṃyatānā-
mamanojña teṣāṃ vacanaṃ śruṇitvā |
karmasvako bhomyahu tasmi kāle
kṛtasya karmasya na vipraṇāśaḥ || 140 ||
na hyatra krodho bhavatī parāyaṇaṃ
kṣāntībalaṃ gṛhṇayahu buddhavarṇitam |
kṣāntiḥ sadā varṇita nāyakehi
kṣāntiṃ niṣevitva na bodhi durlabhā || 141 ||
ahaṃ ca bhomī sada śīlavanto
anyāṃśca śīlasmi pratiṣṭhapemi |
śīlasya varṇu sadahaṃ bhaṇāmi
varṇaṃ ca bhoti mama tatra bhāṣitam || 142 ||
araṇyavarṇaṃ ca sadā pi bhāṣe
śīlasmi co bhomi sadā pratiṣṭhitaḥ |
samādapemi ahu anya poṣadhe
tāṃścaiva bodhāya samādapemi || 143 ||
tān brahmacarye'pi samādapemi
arthasmi dharmasmi pratiṣṭhapemi |
teṣāṃ ca bodhimyahu bodhimārgaṃ
yasminnime bhonti ananta saṅgāḥ || 144 ||
smarāmyahaṃ kalpamatītamadhvani
yadā jino āsi svarāṅgaghoṣaḥ |
pratijña tasyo purataḥ kṛtā me
kṣāntībalo bhomyahu nityakālam || 145 ||
tatra pratijñāya pratiṣṭhihitvā
varṣāṇa koṭī caturo aśītim |
māreṇahaṃ kutsita paṃsitaśca
na caiva cittaṃ mama jātu kṣubdham || 146 ||
jijñāsanāṃ tatra karitva māro
jñātvāna mahyaṃ dṛḍha kṣāntimaitrīm |
prasannacittaścaraṇāni vandya me
pañcaśatā bodhivarāya prasthitāḥ || 147 ||
amatsarī bhomyahu nityakālaṃ
tyāgasya co varṇa sadā prabhāṣe |
āḍhyaśca bhomī dhanavān mahātmā
durbhikṣakāle bahu bhomi dāyakaḥ || 148 ||
ye bhikṣu dhārenti imaṃ samādhiṃ
ye cāpi vācenti ya uddiśanti |
karomi teṣāṃ ahu pāricaryāṃ
sarve ca bheṣyanti narāṇamuttamāḥ || 149 ||
karmaṇā tenāhamanuttareṇa
paśyāmi buddhān bahu lokanāthān |
labhitva pravrajya jinānuśāsane
bhavāmi nityaṃ vidu dharmabhāṇakaḥ || 150 ||
dhūtābhiyukto ahu bhomi nityaṃ
kāntāramāraṇya sadā niṣevī |
nāhārahetoḥ kuhanāṃ karomi
saṃtuṣṭu bhomī itaretareṇa || 151 ||
anīrṣuko bhomyahu nityakālaṃ
kuleṣu cāhaṃ na bhavāmi niśritaḥ |
kuleṣu saktasya hi īrṣya vardhate
anīrṣyukastuṣṭi vaneṣu vindami || 152 ||
maitrīvihārī ahu bhomi nitya-
mākruṣṭu santā na janemi krodham |
maitrīvihāriṣyami sūratasya
caturdiśaṃ vardhati varṇamālā || 153 ||
alpecchu saṃtuṣṭu bhavāmi nitya-
māraṇyakaścaiva dhutābhiyuktaḥ |
na cotsṛjāmī ahu piṇḍapātaṃ
dṛḍhaṃ samādhāna dhuteṣu vindami || 154 ||
śrāddhaśca bhomī manasaḥ prasādo
bahuprasādaḥ sada buddhaśāsane |
prasāda bahu lapsyami ānuśaṃsā
prāsādiko bhomi ahīna indriyaḥ || 155 ||
yaścaiva bhāṣāmyahu tatra tiṣṭhe
pratipattisāro ahu nityu bhomi |
pratipattisārasyimi devanāgāḥ
kurvantyusthānu prasannacittāḥ || 156 ||
guṇā ime kīrtita yāvatā me
ete ca anye ca bahū aneke |
ye śikṣitavyāḥ sada paṇḍitena
yo icchatī budhyitu buddhabodhim || 157 ||
smarāmyato bahutaru duṣkarāṇi
ye pūrvakalpe caritānyaneke |
bahuṃ pi dānīṃ bhaṇitu na śakyaṃ
gacchāmi tāvat sugatasya antikam || 158 ||
sutīkṣṇaprajño vidu bodhisattvo
tasmin kṣaṇe sparśayi pañcabhijñā |
ṛddhīya so gacchi jinasya antike
sa prāṇikoṭībhiraśītibhiḥ saha || 159 ||
dṛḍhabalo paramu udagra āsīt
sārdhaṃ tadā koṭiśatehi ṣaṣṭibhiḥ |
upasaṃkramī mūlu tathāgatasya
vanditva pādau purato nyaṣīdat || 160 ||
adhyāśayaṃ tasya viditva rājño
imaṃ samādhiṃ dvipadendra deśayi |
śrutvā ca so pārthivimaṃ samādhiṃ
ujjhitva rājyaṃ nirapekṣu pravrajī || 161 ||
sa pravrajitvāna imaṃ samādhiṃ
bhāveti vāceti prakāśayeti |
sa ṣaṣṭibhiḥ kalpasahasru paścāt
padmottaro nāma jino abhūṣi || 162 ||
ṣaṣṭistadā koṭiśata anūnakā
ye rājña sārdhaṃ upasaṃkramī jinān |
te cāpi śrutvaiva samādhimetaṃ
tuṣṭā udagrāstada pravrajiṃsu || 163 ||
te pravrajitvāna imaṃ samādhiṃ
dhāreṃsu vāceṃsu prakāśayiṃsu |
ṣaṣṭīna kalpāni nayutāna atyayā
spṛśiṃṣu bodhiṃ varamekakalpe || 164 ||
anantajñānottaranāmadheyā
abhūṣi buddhā naradevapūjitāḥ |
tadekameke dvipadānamuttamo
mocenti sattvānyatha gaṅgavālikāḥ || 165 ||
śīrībalo rāju ahaṃ abhūṣi
imāṃ caranto varabodhicārikām |
ye mama putrāḥ śata pañca āsan
imameva ete anudharmapāpāḥ || 166 ||
evaṃ mayā kalpasahasrakoṭayo
ārabdhavīryeṇa atandritena |
samādhi paryeṣṭa ayaṃ viśuddhaḥ
samudānayanneti tamagrabodhim || 167 ||
kumāra tasmāddhi ye bodhisattvā
ākāṅkṣate etu samādhimeṣitum |
ārabdhavīryo nirapekṣu jīvite
mamā kumārā anuśikṣate sadā || 168 ||
iti śrīsamādhirāje bahubuddhanirhārasamādhimukhaparivarto nāma saptadaśaḥ ||